سياسة الخصوصية

آخر تحديث: 18 تشرين الثاني 2026

شو منجمع

لما تعمل حساب منحفظ إيميلك واسمك واسم المستخدم، والجنس إذا اخترته (مشان صوت المساعد وشكل الشخصية). ومنحفظ معلومات اشتراكك: بداية التجربة، الخطة، تاريخ الانتهاء، وكودك الخاص.

لما تدفع، منحفظ تفاصيل الدفعة اللي بتبعتها: رقم العملية، المبلغ والعملة، التاريخ، اسم المرسل وآخر أرقام حسابه إذا كانوا بالإيصال، وصورة الإيصال إذا رفعتها. هالمعلومات بتلزمنا لنتأكد إنو التحويل وصل.

محتوى حياتك

كل شي بتكتبه جوّا التطبيق (مهام، ملاحظات، مصاري، صحة، صلاة، دراسة، شغل، ناس…) بينحفظ أولاً على جهازك، وبيتزامن مع حسابك مشان يوصل لأجهزتك التانية. هالبيانات محمية بصلاحيات على مستوى كل سطر، يعني ما حدا بيقدر يقراها غيرك ومين إنت شاركته.

الإدارة ما عندها أي واجهة لتشوف هالمحتوى. لوحة الإدارة بتعرض بس معلومات الحساب والاشتراك والدفعات.

الذكاء الاصطناعي

النماذج بتنزل على جهازك وبتشتغل عليه. الكلام اللي بتحكيه للمساعد، والنصوص اللي بيقراها أو بيلخصها، ما بتنبعت لأي خدمة خارجية.

شو ما منعمل

  • ما منبيع بياناتك ولا منشاركها مع معلنين.
  • ما في إعلانات ولا متتبّعات إعلانية بالتطبيق أو بالموقع.
  • ما منستعمل محتواك لتدريب أي نموذج.

مين بيخدّمنا

البيانات محفوظة عند Supabase (قاعدة البيانات وتسجيل الدخول)، والمزامنة عبر PowerSync، والموقع وملفات التحميل على Cloudflare. إيميلات التأكيد بتنبعت عبر Brevo من noreply@life-los.app. كل الاتصالات مشفّرة (HTTPS).

المدة والحذف

منحتفظ ببياناتك طول ما حسابك موجود. إذا خلص اشتراكك ما منمسح شي، وبتقدر تصدّر كل بياناتك بملف واحد من إعدادات التطبيق. إذا بدك نحذف حسابك وكل بياناته نهائياً، ابعتلنا من نفس إيميل الحساب على support@life-los.app.

تواصل

لأي سؤال عن خصوصيتك: support@life-los.app أو @lifeos.sy